آرَمْ حَهْ بَزَمَانْ عَجْ مَيْهْ شَمْ نَبْهُرْ أَزْعَمْ حَهْ بَسَاقَطْرِي، نَبْهُرْ عَضْ وَمَطْلِمْ وَشَيْهْ دِ هَهْ عاچَهْ وَدِ هَهْ بَرْهُوْ وَدِ هَهْ قَنْهَيْتَنْ دِ مَنْيْهَنْ فَڛُوْ وَتَضِمُهْ، عَفْ طَيْهْ سَنَهْ أَكُبْ عَيْهَنْ ڛَاقَرْ حَرَبْ، تَابِلْ نَبْهُرْ دِ هَهْ مَالْ وَزَعَى دِ هَهْ عاچَهْ وَدِ سَهْ بَرْهُوْ كُرْ إطَعَنْ دِ حَڸْفْ دِ يَحْڛَيْهْ دِ بَيْهْ رِيْهُوْ وَأَقْنِيُّهْ.
طَهَرْ مَنْ حَڸْفْ دِ حَڸْفْ يَحُورَى مَنْ حَيْ عَفْ إِكُسَى طَدْ حَڸْفْ دِ بَيْهْ عَافِيَهْ دِ الله.
تُوْ شَاقَلْ بَيْهْ دَهْ حَڸْفْ وَشَاقِلْ هَيْهَنْ دِ هَنْ مَالْ طَهَرْ نَبْهُرْ إڛَامْ قَڛْعُرْ ڸَأفُوْ ڸَحَهْ.
عَمَرُهْ هَيْهْ دِ هَهْ عاچَهْ: يَهْ ڛَيْرَنْ عَنْ نَهَفْكْ مَنْ ڛِيَامَهْ لَهَنْعَهْ قَڛْعُرْ وَعَ تَقْڸَعْ بِيْنْ وَعَرُبْكْ بِڛِيْ ڸَحَهْ أَفُوْ مَنَاڸْ تَعَدْ وَشَرْحَقْ حَڸْفْ وَحَنْ تَاجَى عِيْنْ حَڛِيْنْ، عَمَرْ هَسْ بَڛِيْ بِيْلَهْ دِ تَكَنْ وَهُهْ أَكْتَنَحْ دِ مَحْڸَى.
أَزْعَمُهْ عاچَهْ تْفَنَقْ سَهْ وَدِ سَهْ بَرْهُوْ، شَعْضَى أَفُوْ وَفَزَعْ دِ هَنْ ڸَعَجْ وَأَجَى عَيْهَنْ، بَعَدْ ڛَڸَهْ حَتَاتَنْ مَنْ طَهْرَهْ دِ عَجْ وَتُوْ أَكُبْ عَمْدْ إمُعُهْ عاچَهْ ڛَأْفْ وَدَكْدَاكَهْ دِ جَدُحُهْ دِ فَانَى بَيْهَنْ، شَرْقُحُهْ دِ تَارْ تَعْتَبُرْ إنَمْ دَنَعَهْ، أَڸْ ڛِيْنَى بِيْلَهْ كَڸْ عَرْهُوْ دِ ڛَرْعْهَنْ دِ أَڸْ عَڛْ، عَمْ چِفَاءْ دِ حِهِيْ دِ تَعَدْ وَتُوتُرْ دَسْ، فِزُعُهْ عاچَهْ وَقَعَسُتْسْ ڛَعْرُهْ.
سَعْتْ هِيْنْتَنْ عَمْ چِفَاءْ كَتَنْحُهْ عاچَهْ حَوْرُهْ مَشْكَكْ دِ رَيَمُهْ دِ مَفْزَاعَهْ مَسْ فَانَى وَمَسْ عِيْنِي، أَتَرُهْ دَسْ وَڸَطْ عَمَرُهْ هَسْ: مَنْ دِ قَهَبَيْهْ؟ لِكَنْ عاچَهْ أَڸْ كَڸُوْ بَسْ أَڸْ طَهْ وَأَڸْ طَهْ.
عَمَرُهْ هَسْ: أَڸْ حَصَيْشْ بَرْ دَهْ حَڸْفْ دِ حَهْ دِ هُهْ مَنْ دِ عَمُرْ هَشْ كُرْ زِعِمْ حَهْ؟ أَڸْ عَتَرْيُهْ عاچَهْ ، كَنُحُهْ عَمَرُهْ هَسْ: قَرِيْرِيْ بَاتَعْطَبْ شَمْ عَ ڸَعَكْ ڸَكْسَكَنْ حَهْ وَلا عَرُمْ هَشْ نَافَعْ دِ يَحْڛَيْهْ دِ أَڸْ أَمْتُڸْشْ ڸَقْدِمْ عَيْهْ بَعِيْنْ.
تُوْ تِتُوْ دِ سَهْ مَتَاڸْ نِڛَمُهْ دِ سَهْ دِ حَڸْفْ، وَعاچَهْ قَصُعُهْ دِ سَهْ بَحَڸْفْ وَسَهْ هَمَنْ يَعَيْهَفْ مَسْ أَلْبَبْ مَنْ فَزَعْ، بِتُهْ عاچَهْ بَرْ دَشْ دِ جَدُحُهْ جَنِّيَهْ دِ عِجَبُهْ كُرْ تَرَبَضْ عَيْهَنْ دِ هَنْ قَعَرْ وَدِ بِسْ وَدِ هَنْ مَالْ، وَعِجَبُهْ كُرْ تْشَضُعُفْيْهَنْ تُوْ عَيْهُفْ نَبْهُرْ. جَرَڛُهْ عاچَهْ ڛَافِيْ وَكَتَنْحُهْ دِ سَهْ دِ قَعَرْ.
أَڸْ جَدَحَسْ عاچَهْ دَاميْ مَنْ عَلْقَهْ عَفْ تَصابَحْ صَحْ، وَأَزْعَمُهْ دِ سَهْ شَمْ وَسَهْ أَڸْ بَڸَجُهْ مَنْ دَعْوَهْ كُرْ إجُدِحَنْ نَبْهُرْ بَا تَعْطَبْ شَمْ.
عَطَبُهْ شَمْ وَعَادْ عَجْ أَڸْ جَدَحْ. فِزُعُهْ عاچَهْ وَطَابِرُهْ نَهَفْسْ وَعَلْقَتْ إفُوڸْ جَنِّيَهْ تْشُوجَسْ ڸَڸْ تَعَمَدْ.
وَتُوْ عَمَدُهْ جَدُحُهْ جَنِّيَهْ دِ سَهْ ڸَوَعْدَهْ وَشَنِيْحُهْ دَسْ تُوْ شَجُوْ مَنْ دِ أَمْشَنْ.
وَتُوْ صِبُحُهْ جَدَحْ نَبْهُرْ وَتُوْ أَقْدَمُهْ عَيْهْ دِ هَهْ عاچَهْ بَشَى مَنْ نِهَحْ بَيْهْ، وَمَاتِلُتْسْ بَدِ كَنْ شَيْهَنْ.
أَفْتَاجْ نَبْهُرْ بَمَتالْ دِ هَهْ دِ عاچَهْ وَفُتْكَرْ إفُوڸْ لِنْفَعْ عَفْ لِبَتْ إنَمْ حَهْ كَنْ، وَتُوْ عَمَدُهْ شَمْ وَجَدَحْ حُزْ دِ تَجُدِحَنْ عَيْهْ جَنِّيَهْ كَسْ بَقَانَهْ دِ قَعَرْ وَعَمُرْ دِ هَهْ عاچَهْ كُرْ تَكُوتِلَنْ عَيْهْ كَنَابَلَهْ دِ دَڸَقْ كُرْ عَ تْڛَنَيْهْ جَنِّيَهْ.
شَقَهْ عاچَهْ دِ سَهْ بَعَجْ بَرْ إِمَعُهْ ڛَأْفْ دِ تَعَدْ وَتُوْتُرْ دَيْهَنْ، أَتَرُهْ دِ فَانَى بَتَرْ وَڸَطْ قَعَيْهْ بَانى، أَقَفُهْ أَنْطَنْ وَڸَطْ ضَعَقُهْ وَتَعَمَرْ: أَهَا طَيْ دِ نَبْهُرْ، أَهَا كَتَنَحْ دِيْنْ وَأَڸْ عَشْ تَجُسِرْ تَعْمِرْ هِنْ بِيْلَهْ عاشْ مَنْ دِ حَرْ، وَأَزْعَمُهْ عاچَهْ حَنْعَهْ هَدَّدْ جَنِّيَهْ دِ سَهْ بَعَجْ.
عَڛْ نَبْهُرْ دِ هَهْ مَن حَڸْفْ وَقَصَعْ بَدَفَهْ دِ هَهْ دِ عاچَهْ وَإصَعَقْ: أَهَكْ هُهْ حَهْ مَرَطْكْ تُشْ نَاعَهْ كُرْ عَ ڸَعَشْ تَجْدِحْ دِ حَهْ حَأْ مَيْ دِ هُهْ بَرْهُوْ وَدِ هُهْ عاچَهْ، عَ ڸَعَشْ تَكْتِنِحْ دِ حَهْ خَطْرَهْ تَالِيَهْ، عَ تَعْمِرْ أَڸْ عَمُكْ هَشْ ناعَهْ.
هِدُوْ عاچَهْ بَعَدْ مَتَالْ دِ سَهْ دِ عَجْ وَعَمَرُهْ: ڸَعَشْ، فِزُعُهْ نَاعَهْ مَنْ نَبْهُرْ. وَمَنْ حَهْ وَأَڸْ عَدُهْ ڛِنَاءْ عاچَهْ جَنِّيَهْ بَزَامْ.
تُوْ لِيَعْجُبْ نَبْهُرْ لِطْهَرْ دِ حَڸْفْ يَعَمَرْ دِ هَهْ عاچَهْ كُرْ تَعَقَڸْ مَيْهْ بِشُلْ بَتَرْ وَدِ هَهْ وَاطِيَتْ ڸَتَرْ دِ قَعَرْ كُرْ تْشَاطِيَنْ جَنِّيَهْ مَيْهْ طَيْ وَتْشُوبَى حَكْ يَهَهْ وَأَڸْ عَدُهْ تَجُدِحَنْ. دَنْعَهْ بَنَافَعْ قَنَّعْ نَبْهُرْ دِ هَهْ عاچَهْ وَأَڸْ عَدُهْ فِزُعُهْ مَنْ جَنِّيَهْ دِ بِرُهْ أَڸْ إرَمُهْ كَڸْ عاچَهْ دِ تَتْوَاهَمْ طَنْعَهْ وَإكَنْ هَسْ.
